المدونات فالمراية
كتبهامستر بين المروكي ، في 6 سبتمبر 2007 الساعة: 17:17 م
أهلا وسهلا
وجدوا راسكم اليوم شرينا واحد المراية ، وقيلا تقدروا تشوفوا فيها وجهكم ومافيها باس وخا مايعجبكمش ، ماتقلقوش ، الماكياج كانقشروه ، الزواق ايطير ، والعرا ماكاينش حسن منوا ، ماشي العرا اللي فراسكم هذا عرا آخر.
كل مرة غادي نزلزا ضياف صحة على شي مدونة ، غادي ندخلوا الكوزينة ديالها فين كتطبخ الإدراجات ، وغادي ندخلوا لبيت الضياف ، وماتنساوش غادي ندخلوا حتى البيت النعاس والمرحاض، وإلى لقينا الدنيا خانزة غادي نقولوها .حيت ماكانحشموش ، مقزدرين ، شي مرات التقزدير كايفيق.
اليوم غادي نبسلوا شوية على واحد بولحية، سميتو…
أشنوا سميتوا بعدا ….
ايه سميتو عبد الله المغربي ، وعندو واحد الدار ديونة سميتها مغرب بلا علمانية.
أوا مرحبا بنا صحة عندك أسي عبد الله المغربي
مدونة مغرب بلا علمانية
بيت الضياف:
دخانا البيت الضياف، داكشي غاية ، السي عبدالله مكستم مهندم، لابس العصري مع راسوا الفيستة والسروال ، قالنا هذا لباس إسلامي وتيقناه ، حيت أوربا نقلاتوا على جدودنا اللولين الله يرحمهم جميعا ويرحم والدينا والدين المسلمين أجمعين ، صاحبي ولد اللخ ، جاه الضحك ونغزتوا باش مايعيقش اسي عبد الله ، حيت الكوستيم الرومي واتاه الصراحة تقال ، وهو ماعزيزاش عليه الحداثة داكشي باش لابس الكوستيم ومعنكر به فالمدونة ديالوا وهو تايداعب واد النبتة.
المهم ، السي عبد الله داير واحد القويديمة ، قاليه صاحبي فين اللحية اللي آمر الرسول باش ترخى شوية ، راه شكل اللحية ديالك ديال مثقفي الحداثة والروامة، قالينا اسي عبد الله مادققوش أخويا ، بنادم لازموا شوية د تفركيس، قلنا ليه بالصحة ، وقلنا لصحاب اللحية بعدو على الراجل.
الكوزينة:
مللي كايبغي اسي عبد الله يطبخ شي حاجة فالمدونة ديالوا ، كايتهلى مزيان ، يعني كايختار شي حاجة حارة ، اللي تجبد الهضرة ، ووتفرقع شوية، بحال هاشي حاجة تنسيك رسومات الدانمارك،وزيد أزيد …
قاليه صاحبي علاش كاتدعي الناس يحملوا داك الفيلم على الشيوعية؟ جاوبوا اسي عبد الله : باش ننصر الإسلام، مابغيناش نقولوا لسي عبد الله بللي هاد الشي راه سرقة واعتداء على حقوق الملكية وأن التحميل اللي كايقترحوا مقرصن ، واللي عمل الفيلم مسكين هزوا الما، ولكن السرقة فيها وفيها هاذي سرقة بيضة ياك أسي عبد الله
بيت النعاس
قالك أسي عبد الله المرأة ماكيعجبها غير الكوزينة، وماكرهاتش تخرج من الخدمة وترجع اطيب وتجفف.
ونزيدو حنا وتنعس يعني ت….
شي مرة قال لي صاحبي نحبسوا اسي عبد الله فالكوزينة ، ونخليوه اتمتع مع راسوا بالطبخ ، مع الزيت والبصلة وووسخ الحوت أرا برع…
المرحاض
القضية خانزة أسي عبد الله نقي شوية المسائل، دبا راه علمناك وغادي نرجعوا عندك أنا وصاحبي، ونشفوا واش درتي داكشي اللي طلبنا
كلمة معطلة:
اسي عبد الله سما المدونة ديالوا مغرب بلا علمانية ، كانسولوه المغرب بآش أصلا….
ـــــــــــــــــــــــــــــــــــــــــــــــــــــــــ
التصنيفات : غير مصنف | أرسل الإدراج | دوّن الإدراج
سبتمبر 6th, 2007 at 6 سبتمبر 2007 9:06 م
Si ce n’est pour régler des comptes personnels, votre blog est très original, il
fera beaucoup de bruit, il aura enfin trop de lecteurs, bon chance
سبتمبر 6th, 2007 at 6 سبتمبر 2007 9:11 م
ماكاين بو كونت أمون فرير
اللي كاندوزوا عندوا كاندوزوا عندو ضياف
غير إلى كايكره الضياف
الضياف ولاد المراية
ميرسي كون عرفنا المدونة ديالك كون دزنا عندك حيت الكار مشا وحنا ماعرفين حد فهاد المدينة
سبتمبر 7th, 2007 at 7 سبتمبر 2007 12:31 ص
دور و برم ليا مع راسك و مرحبا بك عندي
أنا عندي غير مرحاض منو كوزينا منو بيت نعاس ؤ فيه نعام آسيدي غادي نستقبلكم
مرحبا ؤ ألف مرحبا
ان شاء ءتقلب بيكم الكار قبل م توصلو لعندي
خوكم ماشي غير مقزدر راه معيط ف السوطة و لي م عاجبوا حال نعجبوليه
عنداك تنسى مرحبا بيك ف الكابينة المغربية
سبتمبر 7th, 2007 at 7 سبتمبر 2007 12:33 ص
تحية مباركة بالشهر الفضيل رمضان الخير
أهله الله على الجميع باذن الله تعالى
أهله الله علينا وقد حققنا امانينا
وجعلنا من عتقائه يارب العالمين
مودتي وتقديري
سبتمبر 7th, 2007 at 7 سبتمبر 2007 8:18 ص
التقزدير فيه أو فيه ألكابينة المغربية
كاين التقزدير اللي كايشبه لطواس
وكاين تقزدير اللي كايزعج مالين الفوق
نتمنى يكون تقزديرك من النوع التاني لأن الأول سوقو خاوي بحال شي ملاوي لاوي
سبتمبر 7th, 2007 at 7 سبتمبر 2007 1:00 م
تحياتي
فكرة جميلة.
الادراج اعلاه لا باس به كبداية في رايي..وارجو ان نرى نواقصنا وعيوبنا في مراتكم فبها نخطو صوب الاحسن.
متمنياتي بالتوفيق
سبتمبر 7th, 2007 at 7 سبتمبر 2007 1:21 م
السلام عليكم ورحمة الله وبركاته .
أخي مستربين نرحب بك في أكبر تجمع عربي على الاطلاق وأرجو أن أكون الضحية الموالية لمرآتكم التي لا تستثني أحدا .
فكرتك جديدة لكن احدر والله أخويا مايدوم غير الماعقول ..
بلقاسم من الرباط .
سبتمبر 7th, 2007 at 7 سبتمبر 2007 1:47 م
محمد مانسيناكش
تهلا فالكوزينة
حنا نباشة
نباشة فشي شكل
سبتمبر 7th, 2007 at 7 سبتمبر 2007 1:49 م
بلقاسم
حنا كاكنتسناوش الترحيب
قولنا ليك تانهجموا عليك ضياف صحة
وماعندنا علاقة لابأكبر تجمع عربي ولاتجمع نمي ولا تجمع ستوني
اللي كانزروه ماشي ضحية
غير وجد راسك
سبتمبر 7th, 2007 at 7 سبتمبر 2007 1:51 م
أرجو أن يكون العمل مبنيا على نقد حقيقي
وإلا فأنا لاأرحب بكم عندي
سبتمبر 7th, 2007 at 7 سبتمبر 2007 2:39 م
السلام عليكم و رحمة الله تعالى و بركاته :
قرأت إدراجك أعلاه و إطلعت على مدونتكم فوجدتها حديثة الانشاء وأول بيت دخلته هو بيتي(مدونتي: مغرب بلا علمانية ).
فكرة جميلة أن ننتقد الاخرين نقدا بناءا و أن نناقش افكارهم ؟ليس بقصد الاساءة أو التنقيص أو الاستهزاء و لكن للبحت عن الصواب فيما كتبه الشخص و التنبيه على الخطأ و مناقشته.
على العموم قرأت مجموعة من الملاحظات أجيبك على المهم فقط :
“”السي عبدالله مكستم مهندم، لابس العصري مع راسوا الفيستة والسروال ، قالنا هذا لباس إسلامي وتيقناه ،”"
أولا تلك الصورة ليست لي بل هي لعالم تركي إسمه هارون يحيى.
”
قاليه صاحبي علاش كاتدعي الناس يحملوا داك الفيلم على الشيوعية؟ جاوبوا اسي عبد الله : باش ننصر الإسلام، مابغيناش نقولوا لسي عبد الله بللي هاد الشي راه سرقة واعتداء على حقوق الملكية وأن التحميل اللي كايقترحوا مقرصن ، واللي عمل الفيلم مسكين هزوا الما، ولكن السرقة فيها وفيها هاذي سرقة بيضة ياك أسي عبد الله”"
أولا الفلم ليس مقرصن و هو موجود على موقع هارون يحيا و يمكنك تحميل العديد من الافلام بالمجان و كدلك الكتب .
و السلام عليكم و رحمة الله تعالى و بركاته
سبتمبر 7th, 2007 at 7 سبتمبر 2007 3:30 م
وفين أسي عبد الله تعطلتي بزاف
دبا إلى هادشي اللي قولتي مقنع ليك راه مشكلة
الصورة اللي قولتي ماشي ديالك كاتشبه لهاديك ديالك اللي فوق وإلى حتى هاديك اللي فوق ماشي ديالك غانقولولك مالك خايف المواقف خصها صور صريحة
ماجاوبتناش على اللحية ياكما ماشي ضرورية
الفيلم مجاني ياك أسي عبد الله والتوثيقات اللي فيه حتى هي مجانية
المهم راحنا راجعين عندك حيت الكوزينة والمرحاض مادققناش فيهم بزاف
سبتمبر 7th, 2007 at 7 سبتمبر 2007 6:33 م
اهلا بسي مستر او بلالا مستر لانك واضع جنس انثى بتعريفك
على كل من خلال قرأتي لموضوعك تبين ان عندك شي صاحبك تتكلم معاه معليش
المهم انا ترحب بيكم بمدونة ديالي وتنقدم ليكم امنياتي با ش نعجبكم وحتى الا معجبتكممشي راهي ما شي مشكل راغكم ضياف الله وحنا مغاربة مضيافين وراني موجدالكم الحلوة والكراص واتاي بالنعناع مشحر ولا هدا رمضان يعني ندير ليكم شي الحلو وسفوف وشي حريرة بالحمص غير نضفو رجليكم قبل ما تدخلو صافي .
ويلاه مع السلامة وراني تنستنى
سبتمبر 7th, 2007 at 7 سبتمبر 2007 6:59 م
أهلا اسية الحراق غادي ندوزوا عنك بلا أتاي
وبلا روج
وجدي الدار مزيان
سبتمبر 7th, 2007 at 7 سبتمبر 2007 7:00 م
أسي مواطن مستقيل
بغيتي ولا مابغيتي غادي ندوزوا علاش بخاطرك ولا
اسير سير
سبتمبر 7th, 2007 at 7 سبتمبر 2007 8:38 م
أنا ماعندي لا كوزينا لا صالون لا مرحاض…أنا هاد الساعة ساكن غير فجلابتي ..وماشي مشكل بغيتي تجي راه غادينوسع الجلابة شوية…المهم هاني فالدورة نتسناك
سبتمبر 7th, 2007 at 7 سبتمبر 2007 9:01 م
و مشيوا تديوها في ريوسكم اولاد ……………..
و غير صحة و فهامات على الخوا
و الجهل باين فيكم
و غير المدونةلولا و حصلتوا اولاد الزبل و الفم الخانز
الي ما عندو شغول يشغل نفسوا بالناس
و سيروا سيروا تخدموا على ريوسكم
اولاد …………
سبتمبر 7th, 2007 at 7 سبتمبر 2007 10:19 م
مرحبا بكم
ومرحبا بنقدكم أ كان بناءا او هداما سيان لدي
نظر الي الناس من شقوق بيتي وعيروني فوجب لي ان افتح لهم الابواب والنوافذ ليروني كما انا لا كما يتخيلون…
سيسرني ان ارى عيوبي ونواقصي بمرآتكم
رحم الله عبدا اهدى لنا عيوبنا
سبتمبر 7th, 2007 at 7 سبتمبر 2007 11:54 م
أسي المجهول قلتي حنا صحاب الفم الخانز
أشنوا كاتقصد بنقط الحذف أمول الفم الزين
ديك ديوها فروسموم هي لغة المخزن وهاداكشي سالا وبين راسك أجمي
راحنا ما كانقطعوش الريوس وماكانقطعوش ….
سبتمبر 7th, 2007 at 7 سبتمبر 2007 11:56 م
رفيق الدرب
غانجو عندك
مللي تكون مشغول
كانبغيوا نجيوا على غفلة
سبتمبر 8th, 2007 at 8 سبتمبر 2007 1:30 ص
و راك عايقة مع راسك آلالاّ ben
م مشيتي حتا درتيها ناري ناري قفرتوها آ صحيبتي
م فراسكش راه عاقو ؤ فاقو ؤ غ يديرو عليك الحصار
المهم نتمنى تبقاي ف الوعد ديالك ؤ تكوني نزيهة ؤ م دّيريش بحال لالاّ خدّوج لّي هرسو ليها لمراية على راسها
عليك بسيدي بو هيضورة باش ءفوسخك شوية
و حيد منك الحضية راكي عيقتي واه سي عبد الله خلنيه منوي غير بوحدو ؤ ساير كيحذف ف شهيوات لي تحرقات ليه ف الكوزينة
أما شي وحدين شدّاتهم القفقافة
أنا بعدا هناني الله م عندي مدونة م عندي مرونة
يلاّه فرجيني فيهوم آ بنت حومتي ؤ تّواعاي لا تغرقي فشي مرحاض خاثر
سلمي عليهوم
سبتمبر 8th, 2007 at 8 سبتمبر 2007 10:32 ص
تحية لمستر….مرحبا بيك، وقتما جيتي الدار دارك وعلق كيما بغيتي، أنا غادي نتصنت ليك مزيان، كيعجبني النقد مزيان، و مبدئي في هاد الشأن أغنية شيخ إمام:مر الكلام.
عجبتني الفكرة مزيان، غادي نقبلك حتى تبني حتى أنت الصالون، بيت النعاس، الكوزينة والمرحاض…..
تحية
سبتمبر 8th, 2007 at 8 سبتمبر 2007 3:24 م
اليوم السبت و بعد الانتخابات التي عرفت عزوفا كبيرا من لدن المجتمع حيث لم تتعدى المشاركة حسب مصادر 42 بالمائة
تقرر الزيادة في ثمن الخبزة المغربية التي أصبح ثمنها 1.30درهم عوض 1.20درهم أي بزيادة 10سنتيمات
سبتمبر 9th, 2007 at 9 سبتمبر 2007 9:22 م
جديد الانتخابات على مدونتي”فوز ساحق للحزب العدمي بالمغرب في الانتخابات”
سبتمبر 9th, 2007 at 9 سبتمبر 2007 11:30 م
نتوما ماشي ضيوف…
نتوكا فضوليين…
كتلكطوا الخبارات…
وكتدخلو الشبوقات…
أنا اللي بغا يجي عندي يصفي نيته….
ولا طعامي كيبرك ليه في الركابي…
سبتمبر 10th, 2007 at 10 سبتمبر 2007 11:19 ص
السلام
قرأت مواضيعك و رحبت بها رغم أن عقلي مازال ضيقا .
أنا أصغر مدونة بمكتوب لا أعلم إن كنتم قد زرتم عالمي أم ليس بعد
و حتى و إن زرتموني يا ضيوفي الأعزاء و أريتموني وجهي في مراياكم الشفافة و انتقدتموني فلن يغير هذا شيئا ما دمت مقتنعة أشد اعتقاد و مؤمنة أنبل إيمان بما أكتب
و فكرتكم أصلا رائعة و تدخل من باب المزاح لكن حذاري أن يتحول إلى ثقيل ، المهم
زوروا مدونتي يوم تشاؤون و اجعلوها رهينة مدحكم أو نقدكم كما تشاؤون فما هو في الأخير إلى ضحك سنتقبله من ضيف جاءنا حاملا نيته في إظهار كمارتنا للكل …
دمت ضاحكا
سبتمبر 29th, 2007 at 29 سبتمبر 2007 10:40 م
يا أخي راك اعجبتني ، و أطلب منك و من صحابك باش دوزو عندي راه كلشي مزيان عندي و الوسع عطا الله الخير و الضيق في القلوب مشي في الجيوب.
بصح النقد البناء اللي وصاوك عليه |أنا مازال عرفتوش، و زيدون النقد غي واحد و الى حبوه يرجع زوج ، هذوك الجمع عيي حالتهم مكتعجبنيش راه فيها و فيها.
أرجو من مرايتك باش تظهرهم على حقيقت هم.
غادي حتى أنا نشري مرايا جديدة نشوف بها